மருத்துவர் மகாத்மியம்

வெளி நாட்டில் இருந்து வருடத்திற்கு ஒரு முறை விடுமுறையில் வரும் ஒரு உறவினர் வழக்கம் போல் ரெகுலர் செக் அப் சென்றுள்ளார்.பிரஷர் சுகர் கொலஸ்ட்ரால் என்று எதுவும் இல்லாதவர்.ஸ்டெத்தை வைத்து மட்டும் பரிசோதித்து விட்டு ஆஞ்சியோ கிராம் உடனே பண்ணி ஆக வேண்டும் என்று மருத்துவர் வற்புறுத்தினார்.குழந்தைகளுக்கு பேய்,பூச்சாண்டி என்று பயம் காட்டுவது போல் வாய்க்குள் நுழைய முடியாத பெயர்களைகூறி கதிகலங்க வைத்து விட்டார்.வழமையான செக் அப் சென்றவருக்கோ அதிர்ச்சி.எந்த பிரச்சினையும் இல்லாமல் எந்த வித பரிசோதனையும் முறைப்படி செய்யாமல் எடுத்த எடுப்பில் ஆஞ்சியோ செய்ய வேண்டும் என்றால் அதிர்ச்சி வராமல் என்ன செய்யும்.

ஏற்கனவே மாரடைப்பு ஏற்பட்டவர்களுக்கு  இருதயத்தில் உள்ள தசைகளின் பாதிப்பைப் பொருத்து, மீண்டும் நெஞ்சுவலி வந்தாலும், பாதிக்கப்பட்டவரின் வயதைப்பொருத்தும் ,உடல் நிலையைப்பொருத்தும் ஆஞ்சியோகிராம் செய்து, அதில் அடைப்பு உண்டா என்று கண்டறிந்து சிகிச்சை செய்வார்கள். இ சி ஜி ,டிரட்மில் ,எக்கோ என்று பல்வேறு பரிசோதனைகளுக்கே பின்னரே ஆஞ்சியோ செய்வதை கேள்விப்பட்டுள்ளோம்.

மருத்துவரிடம் இதனை கேட்டபொழுது “நீங்கள் பாரினுக்கு செல்கின்றீர்கள்.இதெல்லாம் தற்காப்புக்குத்தான்.மற்ற ஹாஸ்பிடலை விட 30%குறைவாகவே கட்டணம் பெறுகிறோம்.இந்த சலுகை இன்னும் ஓரிரு வாரங்களுக்கு மட்டுமே.ஒரே நாளில் வீட்டுக்கு அனுப்பி விடுவோம்.நாளையே அட்மிட் ஆகி விடுங்கள்.” என்று வார்த்தை ஜாலம் செய்துள்ளார்.

எடுத்த எடுப்பிலேயே ஆஞ்சியோ என்பவர் அடுத்து ஆஞ்சியோபிளாஸ்டி (Angioplasty),பைபாஸ் (CABG) லெவலுக்கு இழுத்து சென்று விடுவாரோ என்று பயந்து போய் ”வீட்டில் கன்சல்ட் பண்ணி விட்டு வருகிறேன்”என்று தப்பித்தோம் பிழைத்தோம் என்று என்று ஓடி வந்து விட்டார்.

அதன் பிறகு எப்படி நிம்மதியாக வெளிநாடு செல்ல இயலும்.வேறொரு மருத்துவரை பார்த்து முறையாக பரிசோதனை செய்து பார்த்த பொழுது அந்த மருத்துவர் முதலாம் மருத்துவர் ஆஞ்சியோ பண்ண சொன்னதை கூறி சிரித்தாராம்.

பிறகுதான் கேள்விப்படுகிறோம்.முதலாம் மருத்துவர் சமீபத்தில்தான் புதிதாக நவீன வசதிகளுடன் ஒரு மருத்துவ மனை எகப்பட்ட லோனை வாங்கி கட்டி முடித்து இருக்கிறார் என்று.

இப்படி பட்ட மருத்துவர்கள் எண்ணற்றவர்கள் உண்டு என்பதுதான் உண்மை.வருத்தமூட்டும் இப்படி நிகழ்வுகளுக்குகிடையில் இப்படியும்  ஒரு மருத்துவர்.

சுமார் நான்காண்டுகளுக்கு முன்னர் காய்ச்சல் ஏதும் இல்லாமலேயே குளிர் திடுமென்று எனக்கு ஏற்பட்டு விட்டது.குளிர் என்றால் தாங்க இயலாத குளிர்.உடனே ஒரு மருத்துவரிடம் சென்றோம்.பிரஷர் பார்த்த பொழுது 80/120 இருக்க வேண்டியது 160/250 காண்பித்தது.மருத்துவர் அதிர்ந்து போய் விட்டார்.நம்ப இயலாமல் மீண்டும் மீண்டும் பிரஷர் செக் செய்து பார்த்தவருக்கு முகமே மாறி விட்டது.உடனே இ சி ஜி எடுத்துப்பார்த்ததில் அது நார்மலாகவே இருந்தது.உடனடியாக ஒரு இஞ்செக்‌ஷன் போட்டு ஒரு அரைமணி நேரம் தூங்க வைத்து மீண்டும் பிரசர் செக் செய்த பொழுது சற்றே குறைந்து இருந்தது.

வீட்டில் போய் நன்கு ரெஸ்ட் எடுக்கும் படி கூறி விட்டு என் கணவரை தனியாக அழைத்து இரவு முழுதும் சற்று கண்காணியுங்கள்.ஏதாவது சிறு மாற்றம் ஏற்பட்டாலும் உடனே இசபெல் ஹாஸ்பிடலுக்கு அழைத்து சென்று விடுங்கள் என்றிருக்கிறாராம்.

மறுநாள் காலையில் மீண்டும் பிரஷர் செக் செய்ததில் நார்மல்.இதனையே ஒரு உறவினரான இன்னொரு மருத்துவரிடன் பிரிதொரு நாள் சொல்லிக்காட்டிய பொழுது “இதையே வேறொரு டாக்டரிடம் சென்றிருந்தால் அந்நேரம் உன்னை ஐ சி யூ வில் படுக்க வைத்து ஆயிரத்தெட்டு பரிசோதனை செய்து ஒப்பன் ஹார்ட் சர்ஜரி வரை போய் இழுத்து விட்டு இருந்திருப்பார்கள் என்று கூறி சிரிக்கின்றார்.

Tweet

தண்ணீர்..தண்ணீர்..

மண் பானைகள்,,தண்ணீர் நிரப்பி வைக்கும் அண்டா,வாட்டர் பில்டர்கள் இப்படியாகப்பட்ட பொருட்கள் எல்லாம் கண்காட்சியில் வைக்கப்படும் பொருளாக மாறிவிட்டது இந்த மினரல் வாட்டர் வரவால்.கிணற்றடி நீர்,நகராட்சிகள் விநியோகம் செய்யும்குடி நீர்,தெருக்குழாயில் கிடைக்கும் குடிநீர்,லாரிகளில் கிடைக்கும் குடிநீர் இப்படி கஷ்டப்பட்டு குடிநீரைப்பெற்று,அதனை காய்ச்சி,வடிகட்டி தண்ணீர் குடிப்பதற்கு சிரத்தை எடுத்த அம்மணிகள் இன்று சல்லிசாக பணத்தைக்கொடுத்து கேன் வாட்டர் வாங்கி மிக சுலபமாக தண்ணீர் பிரச்சினையை சமாளிக்கின்றனர்.இப்படி காசு கொடுத்து வாங்கும் நீர் தரமானதுதானா?உடலுக்கு கெடுதல் விளைவிக்காது  என்பதில் உறுதி கிடையாது.தமிழ்நாட்டில் ஐம்பது சதவிகித மக்கள் இந்த மினரல் வாட்டரைத்தான் அருந்துகின்றனர்

விருந்தினர் வந்தால் குடிப்பதற்கு நீர் கொடுத்தால் “மினரல் வாட்டர் தானே”என்ற கேள்விக்கு இல்லை என்று பதில் வந்தால் முகசுளிப்புத்தான் பதிலாக கிடைக்கும் பலரிடமிருந்து.”எங்கள் வீட்டில் கார்பரேஷன் வாட்டர் எல்லாம் குடிப்பதில்லை”இந்த வார்த்தைகளில் பெருமிதம் கொள்கின்றனர் தமிழக மக்கள்.


மக்களின் மனோபாவத்தை அறிந்த கில்லாடி வியாபாரிகளுக்கு லாபநோக்கை மட்டுமே கருத்தில் கொண்டு பல்வேறு பன்னாட்டு உள்நாட்டு நிறுவனங்களுக்கும் தண்ணீர் பிசினஸில் கல்லாக்கட்டுங்கள் என்ற உரிமையை தாராளமாக வழங்கி வள்ளல் தனம் புரிந்துகொண்டுள்ளது தமிழக அரசு.

தமிழகத்தில் அங்கீகரிக்கப்பட்ட மினரல் வாட்டர் நிறுவனங்கள் 700க்கும் மேல் இருந்தால் போலியான நிறுவங்கள் 2000க்கும் மேல் என்று ஆய்வுகள் கூறுகின்றது.போலி நிறுவனங்களில் அன்றாடம் ரெய்ட் என்ற பெயரில் ஒரு கண் துடைப்பை நடத்தி,இரண்டு நாட்களுக்கு மூடு விழா நடத்தி இரண்டாம் நாளே ஜகஜோராக வழக்கப்படி கல்லாகட்டும் வேலை ஆரம்பித்து விடுவது வாடிக்கை.

பத்திரிகைகளில் வந்த  செய்திகளின் அடிப்படையில் தென்னிந்திய பசுமை தீர்ப்பாயம் தானாக முன்வந்து வழக்கை பதிவு செய்து அங்கீகாரம் இல்லாத தண்ணீர் நிறுவனங்கள்  மீது நடவடிக்கை எடுக்கும் படி தமிழ்நாடு மாசுகட்டுப்பாட்டு வாரியத்திற்கு உத்தரவிட்டுள்ளது.அதிரடி சோதனை நடத்தியதில் உரிமம் பெறாத 103 மினரல் வாட்டர் நிறுவங்களுக்கு மின் இணைப்பு துண்டிக்கப்பட்டு சீல் வைக்கப்பட்டள்ளது.

இந்த அதிரடி நடவடிக்கைகளினால் மற்ற எல்லா  தண்ணீர் சப்ளை செய்யும் நிறுவனங்களும் மாசுகட்டுப்பாட்டு வாரியத்தின் நடவடிக்கைக்கு எதிர்ப்பு தெரிவித்து
தண்ணீர் சப்ளை செய்வதை நிறுத்தி விட்டது.வரும் 20 ஆம்தேதி முதல் முழு வேலைநிறுத்த போராட்டத்துக்கு தயாராகி வருகிறது.

ஒவ்வொரு இல்லத்தரசியும் இந்நிலை கண்டு அரண்டு போய் இருப்பது என்னவோ உண்மைதான்.சென்னையில் பல இடங்களில் முறையாக குடிநீர் வரி செலுத்தி வந்தாலும்,மாநகராட்சி வழங்கும் மெட்ரோ வாட்டர் வருடக்கணக்காக வருவதில்லை.பல குடியிருப்புகளில் நிலத்தடி நீர் உண்ணத்தகுதியான தரத்தில் இருப்பதில்லை.பன்னாட்டு உள்நாட்டு நிறுவங்கள்,அடுக்குமாடி குடி இருப்பில் வசிப்பவர்கள், மெட்ரோ வாட்டர் வராத மேடான பகுதிகளில் வசிப்பவர்கள் மினரல்  வாட்டரை மட்டும்தான் நம்பி வாழ்கின்றனர்.20 ஆம்தேதிக்கு பிறகுதான் முழு வேலை நிறுத்த போராட்டம் நடை பெறும் என்று அறிவித்தாலும் இப்பொழுதே தண்ணீர் சப்ளை நிறுத்தி வைக்கப்பட்டு விட்டது.அக்கம் பக்கத்து கடைகளில் ஸ்டாக் வைத்திருக்கும் தண்ணீர் கேன்களை அதிக விலை கொடுத்து வாங்கி வரும் நிலைக்கு மக்கள் தள்ளப்பட்டுவிட்டனர்.அதுவும் ஸ்டாக் இருக்கும் வரையே.

அரிசி பஞ்சம் வந்த பொழுது மற்ற தானிய பொருட்களை சமைத்து உணவாக்கினர்.பாலுக்கு பஞ்சம் வந்த பொழுது அதிக விலை கொடுத்து பால் வாங்கி குழந்தைகளுக்கு கொடுத்து விட்டு பெரியவர்கள் கருப்பு நிற காபியை அருந்தி வந்த காலமும் சரித்திரத்தில் உண்டு.பீன்ஸ் விலை 100 ரூபாயானால் பீன்ஸ் பொரியல் இல்லாமலும்,பீன்ஸ் போடாத வெஜிடபிள் புலாவும் இல்லாமல் மக்களால் வாழ முடியும்.வெங்காயம் விலை ராக்கெட் வேகத்தில் ஏறுமுகம் காட்டிய பொழுது நான்கு வெங்காயம் சேர்த்து செய்யும் சமையலில் பாதி வெங்காயத்தை சேர்த்து சமையலை கச்சிதமாக முடிக்கும் திடம் வாய்ந்தவர்கள் தமிழகத்து அம்மணிகள்.ஏன் தங்கம் விலை உச்சாணிக்கு போன போது பெண் மக்களின் திருமணங்களில் சவரன் எடை கிராமாக மாற்றமாகிப்போனது.ஆனால் குடிநீருக்கே பஞ்சம் ஏற்பட்டால்...?

தண்ணீர் வந்து குற்றால அருவியாக கொட்டும் என்ற அதீத எதிர் பார்ப்பில் 30000 லிட்டருக்கு பெரிய சம்ப் ஒன்று கட்டி வருடங்கள் ஆறை கடந்து விட்டாலும் இதுவரை ஒரு சொட்டு கார்பரேஷன் தண்ணீர் வந்து விழவில்லை.துன்பத்திலும் ஒரு இன்பம் என்பது போல் கார்பரேஷன் நீர்தான் வரவில்லை என்று லாரி தண்ணீரை விலை கொடுத்து வாங்கி சம்பை நிரப்பிக்கொள்ளும் துர்பாக்கிய நிலை இல்லாமல் இறைவன் கிருபையால்  நிலத்தடி நீர் அட்ஷ்ய பாத்திரமாக விளங்கினாலும் குடிப்பதற்கு தகுதி இல்லையே?

பத்து கிலோ மீட்டர் தூரத்தில் இருக்கும் உறவினர் வீட்டிற்கு காலி கேன்களை எடுத்துக்கொண்டு தண்ணீருக்கும் அலையப்போகும் நிலை தண்ணீர் தண்ணீர் சினிமாவை நினைவூட்டி பீதியைக்கிளப்புகிறது.(உறவினர் இருக்கும் ஏரியா பள்ளமான பகுதியாதலால் கார்பரேஷன் நீர் சம்பில் நயாகரா நீர்வீழ்ச்சியாக கொட்டி ஓவர் ஃப்ளோ ஆகி அதனைப்பார்த்துவிட்டு மாநகராட்சி ஆட்கள் ஸ்பாட்பைனை தீட்டிவிட்டு செல்வது தனிக்கதை)

சென்னையை பரபரப்பாக்கிக்கொண்டு இருக்கும் குடி நீர் தட்டுப்பாட்டை போக்க மாநகராட்சி லாரிகளில் நீர் விநியோகம் செய்ய ஆரம்பித்தாலும் உரிமம் பெறாத தண்ணீர் கம்பெனிகள் கன ஜோராக மீண்டும் சைலண்டாக திறக்கப்பட்டு வெகு விரைவில் கல்லா கட்டி,பரபரப்பாக பேசப்பட்டு வரும் தண்ணீர் தட்டுப்பாடு வெகு விரைவில் நீங்கிவிடும்  என்பது அனைவரும் அறிந்த ரகசியம் .

Tweet

வீடு வாங்கலாமா?

பிளாட்(plot) வாங்கலாமா?ஃபிளாட்(flat) வாங்கலாமா?தனிவீடு வாங்கலமா?அடுக்கு மாடி வீடு வாங்கலாமா?நிலம்,கட்டிடங்களின் விலை இப்படி விண்ணை எட்டிக்கொண்டே போகிறதே.குறையுமா இல்லை இன்னும் அதிகரிக்குமா?தனிவீடாயின் வில்லங்கம் வந்து விடுமா?பில்டர் நினைத்த படி கட்டி முடித்து தருவார்களா?வீடு வாங்க நினைப்பவர்களின் மனதில் எழும் பல கேள்விகளில் இந்தக்கேள்விகள் முக்கியமானது.

ரெகுலர் இன்கம் வேண்டுமென்றால் ஃப்ளாட்டிலும், நீண்டகால முதலீடுக்கு பிளாட்டிலும் முதலீடு செய்வதே சிறப்பானதாகும்.

எப்பொழுதுமே நம் நாட்டில் ஐ டி துறையைச்சார்ந்தே  நிலங்களின்,அடுக்கு மாடி குடி இருப்புகளின் வளர்ச்சியும் ,வீழ்ச்சியும் இருக்கும்.மற்ற துறைகளை விட ஐ டி துறையினருக்கு வருமானம் அதிகம்.வருமானவரித்தொல்லைகளில் இருந்து விடுதலை பெற அதிகளவு நிலமாகவோ,அடுக்குமாடி குடியிருப்புகளாகவோ வாங்குகின்றனர். சம்பாதிக்க ஆரம்பித்த உடனேயே ஒரு வீட்டுக்கு சொந்தக்காரர் ஆகி விடுகின்றனர்.

இப்பொழுது உள்ள விலை வாசியில் நடுத்தர வர்க்கத்தினர்  அவரவர் தகுதிக்கு எற்றார் போல் அடுக்குமாடி குடி இருப்புகளையே வாங்க விரும்புகின்றனர்.கால் கிரவுண்ட் வாங்கக்கூடிய விலையில் முழுதாக ஒரு வீட்டையே வாங்கி குடி புகுந்து விடலாம்.

புறநகர்ப்பகுதிகளில் நிலங்கள் வாங்கி முதலீடு செய்தால் அது ஆக்கிரமிக்கப்படும் அபாயமும் உள்ளது. பிறகு ஆக்கிரமிப்பாளர்களைக் காலி செய்ய கோர்ட் கேஸ் போன்ற அலைச்சல்,காலி செய்ய பணம் ,வாங்கிய நிலத்தை அவ்வபொழுது சென்று கண்காணிக்கும் சிரமம்,டென்ஷன் என்று ஏகப்பட்ட பிரச்சினைகளுக்கு பயந்து  ஃப்ளாட்டுக்களில் செய்யும் முதலீடு அதிக சிக்கலில்லாதது அதுவே சிறந்ததாக கருதுகின்றனர்.இன்னொரு பிளஸ் பாயிண்ட் என்னவென்றால் கையிலே காசு வாயிலே தோசை என்பது போல் முதலீடு செய்த சில மாதங்களில் வாடகை மூலம் வருமானமும் வரும்,ஃபிளாட்டின் மதிப்பும் (Appreciation ) உயர்ந்து கொண்டே செல்லும் என்று கணக்கு போடுபவர்கள் அதிகம்.

சொந்த வீடு அனைவரின் கனவாக,இலட்சியமாக உள்ளது.ரிசர்வ் வங்கி வீட்டுக்கடன் வட்டியை குறைத்ததுமே பலரும் வீடு வாங்க நினைகின்றனர்.தங்கள் சேமிப்பில் முழு தொகையை வைத்து வீடு வாங்குவோரை விட,அதிகளவு வங்கி கடன் பெற்று வாங்குபவர்களே அதிகம்.பில்டர்களும் 20% சொந்த பணம் போதும்.மீதி 80% நாங்களே ஏற்பாடு செய்து தருகின்றோம் என்று சுண்டி இழுக்கின்றனர்.

வீடு வாங்குபவர்கள் தங்களுடைய பட்ஜெட்டுக்கு தகுந்தவாறு,தரமான திருப்திகரமான வீடுகளை வாங்க நினைப்பவர்கள் முதலில் நல்லதொரு பில்டரை தேர்வு செய்வது நல்லது.பற்பல விஷயங்களை பொறுத்தே ஒரு பிளாட்டின் விலையை மதிப்பீடு செய்ய  முடியும்.  வீட்டைக்கட்டும் பில்டர்,பிளாட் அமைந்துள்ள இடம்,உள்கட்டமைப்பு வசதிகள் கொண்ட ஏரியா, ஃபிளாட்டின் வசதிகள்,கட்டுக்கோப்புகள்,உபயோகிக்கப்படும் பொருட்கள் ,பராமரிப்பு,  போன்ற  அம்சங்களை கொண்டு ஒரு ஃபிளாட்டின் விலை மதிப்பிடப்படுகிறது.

இதற்கு முன் அந்த நிறுவனத்தினர் கட்டிய அடுக்குமாடி குடியிருப்புகள்,நிறுவனத்தினரின் செயல்பாடுகள் அதன் வசதிகள் என்று அக்குவேறாக ஆணி வேறாக அலச வேண்டுவது அவசியம்.ஒரு புடவை வாங்குவதென்றாலே நான்கு கடைகள் ஏறி இறங்கும் பொழுது முழுதாக ஒரு வீடு வாங்கும் பொழுது கண்டிப்பாக சிரமம் ஏற்று அலைந்தாக வேண்டியது அவசியம்.

சதுர அடியின் விலை சற்று அதிகமாயினும் தரமான,முன்னணி பில்டர்களிடம் வாங்குவது இன்னும் பாதுகாப்பானது.உடனே குடி புகத்தேவை இல்லை என்றால் கட்டிடடத்திற்கு அஸ்திவாரம் போடும் பொழுதே நாம் புக் செய்து விட்டால் குறைந்த விலையில் வாங்கி விடலாம்.அதுதான் புத்திசாலித்தனமும் கூட.அடித்தளம் போடும் பொழுது 5000 ரூபாய் ஒரு சதுர அடி என்று அறிவித்து இருந்தால் 20 சதவிகிதம் வேலைகள் நடந்து கொண்டிருக்கும் பொழுது 5300 ஆகி விடும்.கட்டிடம் படிப்படியாக முழுமை பெற பெற சதுர அடியின் விலையும் எகிறிக்கொண்டே இருக்கும்.ஆரம்பநிலையில் விலை குறித்து பில்டர்களிடம் அடித்து பேரம் பேசலாம்.அவர்களும் நிறைய இறங்கி வருவார்கள்.ஃபிளாட் வாங்குபவர்களுக்கும் முதலீட்டுப் பெருக்கம் என்பது அவர்கள்  எதிர்பார்த்த அளவுக்கு அதிகமாக கிடைக்கும்.

முந்திய பதிவில் படித்த மாதிரி பில்டர்களின் கலர் கலர் விளம்பரங்களை அப்படியே நம்பி, வார்த்தை ஜாலங்களில் மயங்கி விடாமல்,அட்வான்ஸ் கொடுக்கும் முன் வாங்குபவர்கள் ராஜா.அட்வான்ஸ் கொடுத்த பின் பில்டர்கள் ராஜா என்பதை கவனத்தில் கொண்டு அட்வான்ஸ் கொடுக்கும் முன்னரே ஏகப்பட்ட ,வேண்டிய கேள்விகள் கேட்டு ,தேவையான கண்டிஷன்கள் போட்டு,தரமற்ற,நியாமற்ற புரமோட்டர்களின் வலையில் வீழ்ந்து விடாமல்,விழிப்புணர்வோடு,பக்கா டாக்குமெண்டில்,அவர்கள் சொல்லும் வாக்குறுதிகளை எழுத்துப்பூர்வமாக எழுதி வாங்கி,அக்ரிமெண்ட் போட்டு,கட்டிடம் கட்டப்படும் காலம் பல தடவைகள் சிரமம் பாராது சென்று கட்டிடத்தின் வளர்ச்சியை கண்கானித்து,ஏமாற்றம்,குறை இருப்பின் அப்பொழுதே புகாராக கூறி,அதற்கான தீர்வு பெற்று ,அக்ரிமெண்டில் உள்ள பிரகாரம் பணம் செலுத்துவதில் கவனம் கொண்டு விழிப்புணர்வுடன் செயல் பட்டால் இனிய இல்லம் நமதே. மொத்தத்தில் பொன்னில் போட்ட காசுக்கும் மண்ணில் போட்ட காசுக்கும் பழுதில்லை என்ற பழமொழிகொப்ப புத்திசாலித்தனமாக,கவனமாக ஆராய்ந்து வீட்டை வாங்கி முதலீடு செய்வது நலமே.

Tweet

வீடு வாங்கலியோ வீடு...

நிலங்களின் மதிப்பு விண்ணுயரம் உயர்ந்து கொண்டே செல்கிறது.உலக பொருளாதாரம் சரிந்து கொண்டே சென்றாலும்,ரியல் எஸ்டேட்டும்,கட்டுமானத்தொழிலும் வானை எட்டிக்கொண்டே,தங்கத்துக்கு நிகரக பறந்து கொண்டுள்ளது.இது பொதுவாக எல்லா ஊர்களுக்கும் பொருந்தும் என்றாலும்  வளர்ந்து வரும் சென்னையில் கட்டுமானத்தொழில் இன்னும் கனஜோராக களைகட்டுகின்றது எனலாம்.

மக்கள்தொகை 56.63 லட்சம் கொண்ட விரிவாக்கப்பட்ட  சென்னையின் பரப்பளவு 430 சதுரகிலோ மீட்டராகும்.

பத்து ஆண்டுகளுக்கு முன் இரவானால் இருளடைந்து இருந்த சில சாலைகள் இன்று ஹார்ட் ஆஃப் சிட்டி ஆகி விட்டது.

ஸ்ரீபெரும்புதூர் தாண்டி நசரத் பெட்டை ,மாம்பாக்கம் என்றும்,சோழிங்கநல்லூர் தாண்டி நாவலூர் கேளம்பாக்கம்,திருப்போரூர்,நெமிலி வரையிலும்,வண்டலூர் தாண்டி ஊரப்பாக்கம்,காட்டாங்கொளத்தூர் மறைமலை நகர் என்றும்,தண்டையார் பேட்டை தாண்டி  திருவொற்றியூர் எண்ணூர் மீஞ்சூர்  பொன்னெரி என்று நகர் விரிவடைந்து கொண்டே செல்வது ரியல் எஸ்டேட் காரர்களுக்கும்,புரொமோட்டர்களுக்கும் லாட்டரி அடித்த கதையாகி விட்டது எனலாம்.

இப்பொழுதெல்லாம் நகருக்குள் சுமார் ஒன்றரை கிரவுண்ட் நிலத்தில் 10 அடுக்கு மாடி குடி இருப்புகளைக்கட்டி விற்று வந்த கதை எல்லாம் அரிதாகிக்கொண்டே உள்ளது.

இன்றைய விலை மதிப்பில் போட் கிளப்  பகுதியில் ஒரு சதுர அடி 25000 இல் இருந்து 30000 வரை அடுக்கு மாடி குடி இருப்புகள் விலை போகின்றது.அதே போல் ஒவ்வொரு ஏரியாவுக்கும் ஐந்து இலக்க எண்களுக்கு குறைவில்லாமல் ஒரு சதுர அடி அடுக்கு மாடி வீடு விற்பனை ஆகிறது.சாமானியர்கள் நகருக்குள் பிளாட் வாங்குவதென்றால் அது கடினமான விஷயமாகிப்போனதால் இப்பொழுதெல்லாம் சென்னையில் புறநகர் பகுதில் அடுக்கு மாடி குடி இருப்புகளை கட்டி கனஜோராக கல்லா கட்டிக்கொண்டு இருக்கின்றனர்.

200 குடி இருப்புகள்,300 குடி இருப்புகள் என்று கட்டியது போக இப்பொழுதெல்லாம் 1000 - 2000 வரை அடுக்கு மாடி குடி இருப்புகளை சகல வசதிகளுடன் கட்டி விளம்பரத்துக்காக கோடி கணக்கில் செலவு செய்து பன் மடங்காக லாபம் பார்த்து விடுகின்றனர்.

கால் செய்தால் வீட்டுக்கே குளிரூட்டப்பட வாகனம் அனுப்பி வைத்து அழைத்து செல்வது,கட்டுமான நிறுவனத்தின் அலுவலகமோ ஒரு பன்னாட்டு சாஃப்ட்வேர் நிறுவனத்தின் தோற்றத்தில்,படு ஹைபையாக காட்சி தருகிறது.அலுவலகத்திற்குள் நுழையும் முன்பே வாசலில் காவலாளி முன் இருக்கும் நோட்டுப்புத்தகத்தில் விபரங்கள் எழுதுவது,உள்ளே நுழைந்ததும் அங்கு நமக்காக காத்திருக்கும் சேல்ஸ் எக்ஸிகியூடிவ் வரிசையாக இருக்கும் அறைகளில் ஒன்றில் கார்ட் பன்ச் செய்து திறந்து உள்ளே அழைத்து சென்று மேஜை மீது மேப்பையும் படங்களையும் விரித்து வைத்துக்கொண்டு வார்த்தை ஜாலம் புரிந்து போணி பண்ணும் திறமையையும்,அங்கிருக்கும் ஊழியர்கள் கோட் சூட் என்று அணிந்து ஆடம்பரம் காட்டி வலம் வருவது,பெரிய திரையில்  அவர்கள் கட்டி வரும்,கட்டப்போகும் கட்டுமானங்களின் விபரங்களை அட்டகாசமாக ஒளி ஒலிகாட்சியாக்கி பார்ப்பவர்களை வியப்பில் ஆழ்த்துவது,இதை எல்லாம் கடந்து,சைட்டை பார்க்க செல்லும் பொழுது அலுவலக வளாகத்தில் ஒன்று பார்த்தாற் போல் வரிசையாக அணிவகுத்து நிற்கும் சைட்டுக்கு அழைத்து செல்லும் வாகனங்கள்,சீருடை அணிந்த ஒட்டுநர்கள் என்று அமர்க்களப்படுத்துகின்றனர்.

இதோ தாம்பரத்தில் இருந்து ஐந்து கிலோ மீட்டர் தூரத்தில்தான்
 நம்ம சைட் என்று அந்த ”ம்”இல் சேல்ஸ் எக்ஸிகியூடிவ் ஒரு அழுத்தம் கொடுப்பார் பாருங்கள்.அப்பொழுதே வீடு நமதாகிவிடும்.

கார் பயணத்தில் அந்த புரமோட்டர் புராணம் பாடி,அவர்கள் ஆற்றி வரும் சேவைகளையும்,திறம் பட அவர்கள் கட்டுமானத்தொழிலில் தமிழகத்தில் செய்து வரும் புரட்சி பற்றியும் விலாவாரியாக விவரித்துக்கொண்டே வரும் பொழுது,அதற்கு கூடவே வரும் ஓட்டுநரும் ஜால்ரா தட்டிக்கொண்டே வருவதை கேட்கும் பொழுது செவி மடுப்பவர்களுக்கு”ஆஹா..வாங்கும் சம்பளத்திற்கு உண்மையாக எவ்வளவு உழைக்கிறார் ”என்று புளங்காகிதபடவைத்து விடுகின்றனர்.

சொகுசு வண்டி கரடு முரடு சாலைகளில் சர்க்கஸ் வித்தை பண்ணிக்கொண்டு ஒரு வழியாக சைட்டை அடைகின்றது.
“என்ன சார்.தாம்பரத்தில் இருந்து ஐந்தே கிலோ மீட்டர் என்றீர்கள்.எவ்வளவுதூரம் பயணித்து விட்டோம்”என்று கூட வருபவர் கொட்டாவி விட்டால்”சூ..சத்தியம் ,ஐந்தே கிலோ மீட்டர்தான்.இதோ நம்ம சைட் இருக்கும் பகுதியில் இப்பொழுது நூறடி சாலைதான்.இதனை இருநூறடி சாலையாக்கப்போகின்றனர்.”என்று பேச்சை நயம்பட திசை திருப்புவார்.

சைட்டிலும் ஆர்பாட்டமாக ஒரு அலுவலகம்,சகல வசதிகளும் செய்யப்பட்ட மாடல் ஹவுஸ்,குடியிருப்புகளை சாலை வசதிகளுடன்,விளக்கு ஒளியுடன் காட்டும் மினியேச்சர் வீடுகள் என்று பார்ப்போரை விழியகல வைத்து விடுகின்றனர்.

அதோ தூரத்தில் தெரிகிறதே கம்பம் அதற்கு பின்னால்தான் நோகியா கம்பெனி வரப்போகிறது.அதோ அந்தப்பக்கம் பென்ஸ் கார் கம்பெனி வரப்போகிறது,இதோ இந்தப்பக்கம் பெரிய மால் கட்டப்போகின்றர். மகேந்திரா சிட்டி கூட வரப்போகிறது என்று தூரத்தே கையை காட்டி விளக்கம் தரும் பொழுது எதிரில் இருப்பவர் வாயைப்பிளந்து பார்த்துக்கொண்டே இருப்பார்கள்.

கரெக்ட் டைமுக்கு பொசிஸன் கொடுப்பதில் எங்கள் கம்பெனியை அடிச்சுக்கவே முடியாது.ஒரு வேளை தாமதாகி விட்டால் அதற்குண்டான வாடகையை தந்து விடுவார்கள்.ஆனால் அதற்கு சந்தர்ப்பமே வராது”சர்க்கரை பாகு தடவிய வார்த்தைகள்.

“நீஙகள் வாடகை பர்பஸுக்கு என்று வாங்கினால் வாடகைக்கு நல்ல ஆட்களை நியமிக்க,வாடகை வசூல் என்று பண்ணித்தரவும் ஆட்கள் இருக்கின்றனர்.நீங்கள் வந்து செல்லும்தொந்தரவே இருக்காது.”

”சுமாராக மூன்று பெட் ரூம் பிளாட்டுக்கு எவ்வளவு வாடகை வரும்”அக்கரையாக கேட்கப்படும் கேள்விக்கு அலர்ட்டான பதிலொன்று வரும்.”முள்ளங்கி பத்தை மாதிரி 20000 ரூபாயை யார் வேண்டுமானாலும் கண்ணை மூடிக்கொண்டு கொடுப்பார்கள் சார்.”

“20000 ரூபாயா...?எங்கள் ஏரியாவில் கூட இவ்வளவு வாடகை வராதே.இப்படி புறநகர் பகுதில் தருவார்களா 20000?”கேள்வியை முடிக்கும் முன் டாண் என்று பதில் வரும்.

“கிளப் ஹவுஸ் உண்டா,ஸ்விமிங் பூல் உண்டா,ஏஸி ஜிம் உண்டா?ஹை ஸ்பீட் இண்டர்நெட் உண்டா?மீட்டிங் ஹால் உண்டா?இண்டோர்கேம் ஜோன் உண்டா?இண்டர்காம் வசதி உண்டா?மெயிண்டனென்ஸ் ஸ்டாஃப் உண்டா?ஃபயர் அலார்ம் உண்டா?விசிட்டர் கார் பார்க் உண்டா?ரூஃப்டாப் பார்ட்டி டெரஸ் உண்டா?கவர்ட் கார்பார்க் உண்டா?எலக்ட்ரானிக் செக்யூரிட்டி உண்டா?பவர் பேக் அப் உண்டா?பைப் கியாஸ் கனெக்‌ஷன் உண்டா?கிரீச் உண்டா?கான்பரன்ஸ் ரூம் உண்டா?ஹெல்த் கிளப் உண்டா?கெஸ்ட்சூட் உண்டா? இதெல்லாம் நாங்கள் தருகின்றோமே சார்”இப்படி அடுக்கிக்கொண்டே கேட்போரை திகைக்க வைத்து விடுகின்றனர்.

இறுதிப்பகுதி அடுத்த பகிர்வில்.

Tweet

ரோல்ஸ் ராய்ஸ் கார்

டிஸ்கி:தலைப்பை பார்த்ததும் "என்னக்கா இந்தக்கார் வாங்கப்போறீங்களா?"என்று ஹுசைனம்மா,ஸ்டார்ஜன் போன்றோர் நக்கல் கமண்ட் போட்டு விடக்கூடாது என்று முன்னெச்சரிக்கையாக இந்த டிஸ்கி.இந்தக்கார் வாங்கும் அளவுக்கு வசதியோ,தகுதியோ,ஆசையோ இல்லை என்று பணிவுடன் சொல்லிக்கொள்கிறேன்)

படிப்பு முடிந்ததும் ஐ டி கம்பெனியில் வேலை,சொந்தவீடோ,இருக்கும் வீட்டை ரிப்பேர் பண்ணவோ,ரயில் நிலையத்தில் இருந்து இரண்டே நிமிடம் என்று தொலைக்காட்சிகளில் கூவி கூவி விற்கும் மலிவு விலை பிளாட்டை வாங்கிப்போடும் எண்ணமோ,அட அம்மாவின் வெற்றுக்கழுத்துக்கு ரெண்டு சவரனில் ஒரு செயினோ வாங்கிக்கொடுக்க மனதில்லாமல்,இவ்வளவு ஏன் வேலைதான் கிடைத்து விட்டதே காலாகாலத்தில் கல்யாணம் பண்ணிக்கொள்ளலாம் என்ற எண்ணம் தலைதூக்காமல் இருக்கும் இன்றைய இளைய தலை முறையினருக்கு கார்தான் உயிர் மூச்சு.அதிலும் சென்னை போன்ற நகரில் வாழ்பவர்களைப்பற்றி சொல்லவே வேண்டாம்.

ஐந்தாயிரம் ரூபாய் வாடகையில் சிறு பிளாட் எடுத்து வசிப்பவன்,சற்றும் தயங்காமல் பதினைந்தாயிரம் ஈ எம் ஐ ஆக கட்ட தயக்கப்படுவதே இல்லை.அவ்வளவு ஏன் மேன்ஷன் வாழ்க்கை வாழ்ந்து கொண்டு மெஸ்ஸில் சாப்பிட்டுக்கொண்டு வாழ்க்கை ஒட்டுபவன் கூட சந்தினுள் தன் காரை பார்க் பண்ணி வைத்துக்கொள்கிறான்.அந்தளவு இன்றைய மனிதனின் வாழ்க்கைக்கு அந்தஸ்தாக போய் விட்டது இந்தநாற்சக்கரவாகனம்.

சாமானியப்பட்டவர்களுக்கே இப்படி என்றால் பணத்தில் புரளும் பிரபலங்களைப்பற்றி சொல்லவா வேண்டும்.ஆடி,பி எம் டபிள்யூ,மெர்ஸிடஸ் பென்ஸ்,ரேஞ்ச்ரோவர்,செரா போன்ற பல லட்சங்களை கோடிகளை கொட்டிக்கொடுத்து வாங்கிய வாகனங்கள் சென்னையின் கரடு முரடு சாலையை அலங்கரித்துக்கொண்டிருப்பது அதிகரித்து வந்தாலும் இப்பொழுது பணக்காரர்களின் ராஜபரம்பரையினரின் அந்தஸ்த்து காரான ரோல்ஸ்ராய்(Rolls-Royce) கார் பவனி வர ஆரம்பித்து விட்டது.ஆம் பிரமாண்ட இயக்குனர் ஷங்கரின் பிரமாண்டமான கார்.தமிழகத்திற்கு வந்திருக்கும் முதல் ரோல்ஸ்ராய்ஸ்.திரை உலகினரை மட்டுமல்லாமல்,தகுதியுடையோரையும் ஏக்கத்துடன் திரும்பி பார்க்கவைக்கும்.

இங்கிலாந்தை சேர்ந்த சார்லஸ் ஸ்டீவர்ட் ரோல்ஸ் மற்றும் ஹென்றி ராய்ஸ் ஆகிய இருவராலும் 1906-ல் ஆரம்பிக்கப்பட்ட ரோல்ஸ்ராய்ஸ் கார் நிறுவனம் ஆடம்பர கார் தயாரிப்பில் புகழ் பெற்றது .ஆரம்பத்தில் காலத்தில் இங்கிலாந்து அரசே ஏற்று நடத்தினாலும் பின்னர் தனியாருக்கு சொந்தமாகி இப்போது பிரபல BMW கார் நிறுவனத்திற்கு சொந்தமாக உள்ளது. பெரும் பணக்கார,அந்தஸ்த்துள்ள வி வி வி ஐ பிக்களுக்காக தாயாரிக்கப்பட்டு,அவர்களால் மட்டுமே உபயோகப்படுத்தப்பட்டு வரும் புகழ்பெற்ற வாகனமாகும்.

இந்தியாவில் மும்பை டெல்லி.ஹைதராபாத் போன்ற இடங்களில் பிரமாண்டமான ஷோரூம்களை திறந்து விறபனை செய்யப்பட்டு வருகின்றது.

பல்வேறு முன்னணி கார் நிறுவங்களின் டீலராக இருக்கும் குன் மோட்டார்ஸ் நிறுவனம் ஹைதராபாத்தை அடுத்து விரைவில் சென்னையிலும் ஷோ ரூமை திறக்க உள்ளது.

உலகின் மதிப்புமிக்க காராக ரோல்ஸ் ராய்ஸ் திகழ்கிறது. அரசப் பரம்பரையினர், பிரபல நட்சத்திரங்கள், பெரும் தொழிலதிபர்கள் மற்றும் அரசியல்வாதிகள் மட்டும்தான் ரோல்ஸ்ராய்ஸ் காரை சொந்தமாக்க முடியும்.உலகில் உள்ள பெரும் புள்ளிகளிடம் மட்டுமே இருக்கக்கூடிய இந்த கார் யாரிடமும் பணம் கோடி கோடியாக கொட்டிக்கிடந்தாலும் அவ்வளவு சுலபத்தில் அனைவராலும் வாங்கி விட இயலாது.வாங்குபவர்களில் பின்புலம்,குடும்பம் ,பெரும் புள்ளிகளுக்கு காரை விற்பனை செய்வதால் தன் நிறுவனத்திற்கு கிடைக்கவிருக்கும் புகழ்போன்றவற்றை தீர விசாரித்த பிறகே அதனை விற்பனை செய்யும் கொள்கையை இந்நிறுவனம் கடைப்பிடித்து உலகில் தன் நிறுவனத்திற்கான மதிப்பை தக்கவைத்துக்கொண்டுள்ளது.

புதிதாக உற்பத்தியாகும் காருக்குத்தான் இத்தனை விலை என்றில்லை

பிரிட்டன் நாட்டில் 1915 முன்பாக தயாரிக்கப்பட்ட ஒரு ரோல்ஸ் ராய்ஸ் கார் அண்மையில் 3.5 மில்லியன் பவுண்டுகளுக்கு ஏலம் போய் சரித்திரம் படைத்துள்ளது.

பாலிவுட் கவர்ச்சி நடிகை மல்லிகா ஷெராவத் ரோல்ஸ் ராய்ஸ் கார் வாங்குவதற்கு புக் செய்ய சென்றுள்ளார். வழக்கம்போல் வாடிக்கையாளரின் தகுதி குறித்து ஆராய்ந்த ரோல்ஸ் ராய்ஸ், உங்களுக்கு நாங்கள் எதிர்பார்க்கும் அளவுக்கு போதிய பின்புலம் இல்லை என்பதை கூறி கார் தர மறுத்துவிட்டது.

உலகின் ஒவ்வொரு பெரும்பணக்காரரும் விரும்பும் விஷயங்களில் ஒன்றான ரோல்ஸ் ராய்ஸ் காரை இந்தியாவில் திரைஉலகத்தினர் சிலர் சொந்தமாக்கி வைத்துள்ளனர்.ஆமிர் கான்,அமிதாப்பச்சன்,தயாரிப்பாளர் விது வினோத்சோப்ரா,சஞ்சய்தத் குடும்பத்தினர் போன்ற சொற்பசிலரே வைத்திருக்கின்றனர்.

கேரளாவை ஆண்ட திருவிதாங்கூர் ராஜகுடும்பத்தின் வாரிசான மன்னர் உத்திராடம் திருநாள் மார்த்தாண்ட வர்மாவின் 90ஆவது பிறந்தநாளுக்காக 5 கோடி மதிப்புள்ள காரை அவரின் அறக்கட்டளை சார்பாக பரிசளிக்கப்பட்ட்து.

பிரபல ஜாய் ஆலுக்காஸ் ஜூவல்லரி குழுமத்தினர் பிரிட்டனில் இருந்து பிரிட்டனில் இருந்து இறக்குமதி செய்தனர்.

எர்ணாகுளத்தை சேர்ந்த பிரபல கல்வி குழுமங்களின் தலைவரான டாக்டர் ஜிபிசி.நாயரும் இக்காருக்கு சொந்தக்காரர் என்ற பெருமைக்கு சொந்தக்காரர்.

மறைந்த சாய்பாபாவும் இக்காருக்கு சொந்தக்காரராக இருந்திருகின்றார்.சாய் பாபாவின் காரை மும்பை பந்த்ரா பகுதியை சேர்ந்த டொயோட்டோ டெக் சர்வீஸ் நிறுவனத்தின் உரிமையாளர் இர்பான் மொகுல் விலைக்கு வாங்கி உள்ளார்.

மைக்கேல் ஜாக்சன் பிரபல பாப் பாடகர்

பிரபல நடிகர் சில்வஸ்டர் ஸ்டேல்லன்

அமெரிக்கா பாடகி ஆரோன் ப்ரெஸ்லி

புருணை சுல்தான்

பிரன்ஞ்ச் நடிகை brigitti bardot

பிரிட்டன் பாடகி ஜான்லெனான்

பிரான்ஸ் தொழிலதிபர் sir alan sugar

இங்கிலாந்து பாடகர் ஜேசன் கே

ஜிம்பாப்வே அதிபர் robert mugambe

அமெரிக்கபாடகி டிட்டி மற்றும் கிறிஸ்டினா ஆகீலேரா

பிரபல கால்பந்தாட்ட வீரர் டேவிட் பெக்காம்

அமெரிக்க நடிகை எட்டி மர்பி

பிரபல ரியல் எஸ்டேட் அதிபர் டோனால்ட் டிரம்ப்

அமெரிக்காவைச்சேர்ந்த டான்ஸர் மைக்கேல் ஃப்லேட்லி

பிரிட்டனை சேர்ந்த இசையமைப்பாளர் imon cowe போன்ற பிரபலங்கள் ரோல்ஸ் ராய்ஸ் காருக்கு சொந்தக்காரர்கள் என்ற பெறுமையை தட்டிச்செல்கின்றனர்.

உலகில் பல லட்சம் அமெரிக்க டாலர்களை விலையாக கொண்ட ரோல்ஸ்ராய்ஸ்காருக்கு நிகரான ,அதனை விட பலமடங்கு அதிகம் விலையுள்ள சொகுசு கார்களான Lamborghini Reventon,Aston Martin One,Bugatti Veyron,agani Zonda Clinque Roadster ,Ferrari Enzo ,Porsche Carrera போன்ற பிரமிக்க வைக்கும் கார்கள் உலகின் பணக்கார நாடுகளில் கம்பீரமாக வலம் வந்தாலும் ரோல்ஸ்ராய்ஸ் காருக்கு தனி மவுசு என்பதுதான் உண்மை.இதற்கு காரணம் தரம்,பயன்பாட்டாளாருக்கான வசதிகள் மட்டுமில்லாமல் அந்த நிறுவனத்தின் கொள்கை ,கட்டுப்பாடும் காருக்கான ராஜமரியாதைக்கு காரணங்களாகும்.

கோடிகளை கொட்டிக்கொடுத்து இக்காரை சொந்தமாக்கி தார்ச்சலையில் உலாவ்ர பெரும் கோடீஸ்வரக்கூட்டம் காத்திருக்கின்றன.இனி வரும் காலங்களில் சென்னையிலும்.

Tweet

வலைப்பதிவர்கள் தினவாழ்த்துக்கள்

வாழ்த்துகள்!!

சர்வதேச வலைப்பதிவர் நாளான இன்று சக வலைப்பதிவு நட்புக்களுக்கும் இனிய

வாழ்த்துக்கள்.

1.1997ஆம் வருடம் டிசம்பர் திங்கள் 17 ஆம்தேதி ஜான் பெர்கர் - John

Barger என்பவர் Webblog என்ற பெயரினை உருவாக்கி பயன்படுத்த ஆரம்பித்தார்.

2.1999 ஆம் வருடம் ஏப்ரல் திங்கள் முதல் பீட்டர் மெர்ஹால்ஸ் - Peter

Merholz என்பவர் Webblog ன் சுருக்கமான blog என்ற பெயரை பயன்படுத்த

தொடங்கினார்.அதுவே இன்றளவும் நிலைத்து விட்டது.

3.1996 ஆம் ஆண்டு எக்சான்யா (Xanya) என்ற நிறுவனம் வலைப்பூ வசதியை

நிறுவத்தொடங்கியது.பிற்பாடு வலைப்பூவின் அசூர வளர்ச்சியைக்கண்டு கூகுள்

நிறுவனம் இதனை விலைக்கு வாங்கி உலகில் உள்ள அனைத்து மொழிகளிலும் வலைப்பூ

ஆரம்பிக்கும் வண்ணம் சேவையை ஆரபித்தது.

4.2003 ஜனவரி திங்கள் 26 ஆம்தேதி குடியரசு தினத்தன்று தமிழிலான வலைப்பூவை

நவன் என்ற வலைப்பதிவர் ஆரம்பித்தார்.இருப்பினும் கார்த்திகேயன் ராமசாமி

என்பவர் முதல் வலைப்பூதாரர் என்று விக்கிப்பீடியாவில்

குறிப்பிடப்பட்டுள்ளது.

5.தமிழ் வலைப்பூக்கள் பற்றிய தகவல்கள்,உருவாக்கும் விதம்,அதன் பயன்

பாடுகள் போன்றவை பத்திரிகைகள் வாயிலாக வெளியிடப்பட்டு அதன் பயன்

பாடும்,வலைப்பூவின் சக்தியும் மக்களிடையே தெரிய வந்தது.

6.தமிழ் வலைப்பூ தொடங்கிய வருடமான 2003 முதல் 2005 வரை வெறும் 1000

வலைப்பூக்கள் மட்டுமே தொடங்கப்பட்டு உலா வந்தன.அடுத்த மூன்றாண்டுகளில்

அதன் எண்ணிக்கை நான்கு மடங்கு உயர்ந்து விட்டன.பின் வந்த ஆண்டுகளில்

பற்பல மடங்குகள் அதிகரிக்கத்தொடங்கி விட்டன.

7.தமிழ் வலைப்பூ வளர்ச்சியால் இணைய எழுத்தாளர்கள் பெருகி தமிழ்

இலக்கியங்கள் அனைத்து வகை மக்களுக்கும் சென்று அடையக்கூடிய ஒன்றாகி

விட்டது.தமிழ் மொழியின் வளர்ச்சி உயர்ந்திடவும் வலைப்பூக்கள் உதவுகின்றன

என்றால் மிகை ஆகாது.

8.ஜஸ்டின் ஹால் (Justin Hall) உலகில் முதன் முதலில்வலைப்பூ எழுத

ஆரம்பித்தவர் என்ற சிறப்பைப்பெறுகின்றார்.

9.உலகிலேயே அதிகம் வயதுடைய வலைப்பதிவர் ஆஸ்த்ரேலியா நாட்டை சேர்ந்த ஆலிவ்

ரைலி ஆவார்.இவரைப்பற்றிய எனது கட்டுரையை காண இங்கு சொடுக்குங்கள்.

10.ஆகஸ்ட் மாதம் 31 ஆம் நாள் சர்வதேச வலைப்பதிவர்கள் நாளென்று

குறிப்பிடும் தமிழ் விக்கி பீடியா அதே சர்வதேச பதிவர்கள் நாளை

ஜூன் மாதம் 14 ஆம் தேதி என்று குறிப்பிடுவது குழப்பத்தை தருகின்றது.

11.வலைபூக்கள் தமிழின் வளர்ச்சிக்கு பெரும்பங்கு வகிக்கின்றன என்றால்

மிகை ஆகாது.முன்னொரு காலத்தில் பத்திரிகைகள் மட்டுமே இருந்தன.இப்பொழுதோ

பதிவர்கள் என்ன நினைக்கின்றார்களோ அதனை அந்நொடியே எழுதி இணையத்தில்

வெளிட்டு உடனுக்குடன் கருத்துரையும் பெற்று விடுகிறோம்.நினைத்ததை

எழுதுவது,அதனை எடிட் செய்யாமல் உடனுக்குடன் வெளியிடுவது,போன்ற பற்பல

வசதிகளைப்பயன் படுத்தி இன்றைய கால கட்டத்தில் பதிவர்கள் சிலரின்

கருத்துக்களும்,பதிவுகளும் படிப்போரை மிகவும் வேதனைக்கு

உட்படுத்துகின்றன.

12.ஒருவர் நம்பிக்கையை மற்றவர் கிண்டலடித்தல்,மதப்பூர்வமான

சண்டைகள்,குடும்ப உறுப்பினர்களைக்கூட கீழ்த்தரமாக வர்ணிக்கும் அவலம்,நான்

பெரியவனா நீ பெரியவனா என்ற ஈகோ,குழு குழுக்களாக செயல் படுதல் இப்படி

பற்பல விரும்பத்தகாதவைகள் அரங்கேறிக்கொண்டு இருக்கும் அவலம் மறைய வேண்டும்.

12.வரும் காலங்களிம் முகம் சுளிக்க வைக்கும் இத்தகைய செயல்கள் அறவே

மறைந்து பதிவர்களுக்கிடையே நல்லுறவும்,ஒருவரை மற்றவர்

மதித்தலும்,சகிப்புத்தன்மையும் வளர்ந்து ஊடகங்களில் மகத்தானது

பதிவுலகம்தான் என்ற சிறப்பை பெற வேண்டும் என்பதே என் அவா.

Tweet

சர்வதேச நாட்கள்

ஜனவரி

10 உலக சிரிப்பு தினம்

12 தேசிய இளஞர் நாள்

15 இராணுவ தினம்

16 விக்கிபீடியா நாள்

19 மதங்கள் தினம்

20 சமூக நிதி தினம்

22 சாரணியர் தினம் .

26 சுங்கவரிதினம்

27 ஹோலோ காஸ்ட் நிகழ்வுகளில் பாதிக்கப்பட்டோர் தினம்

28 நோயாளர் தினம்

29 அரசியலமைப்பு நாள்

30 தொழுநோய் ஒழிப்பு தினம்&தியாகிகள் தினம்

பிப்ரவரி

02 புனித வாழ்வுக்கான தினம்&சதுப்புநிலதினம்

08 பரிநிர்வாண நாள் - பௌத்த வழிபாட்டு நாள்

11 காதலர் தினம்

12 டார்வின் நாள்

21 தாய் மொழிகள் தினம்

24 கலால் வரி தினம்

28 அறிவியல் தினம்

மார்ச்

06 புத்தகங்கள் தினம்

08 பெண்கள் தினம்&எழுத்தறிவுதினம்

11 பொது நலவாய அமைப்பு தினம்

13 சிறுநீரக விழிப்புணர்வுதினம்

15 நுகர்வோர்தினம்

20 ஊனமுற்றோர்தினம்&சிட்டுக்குருவிகள் தினம்

21 காடுகள்தினம்&சர்வதேச இனவேறுபாட்டுக்கு எதிரான தினம்&கவிதைகள் தினம்

22 தண்ணீர்தினம்

23 தட்பவெப்பநிலை தினம்

24 காசநோய் தினம்

28 கால் நடை மருத்துவ தினம்

ஏப்ரல்

01 முட்டாள்கள் தினம்

02 சிறுவர் நூல் நாள்

04 நிலக்கண்ணி வெடி விழிப்புணர்வுதினம்

05 சமுத்திரதினம்

07 சுகாதார தினம்

08 உரோமர் கலாச்சாரதினம்

12 வான் பயண தினம்&வீதியோர சிறுவர்களுக்கான தினம்

14 அமைதி தினம்

15 அரவாணிகள் தினம்&நூலகர்கள் தினம்

17 இரத்த உறையாமை தினம்.

18 மரபு தினம்

19 புகைப்பட தினம்

22 பூமி தினம்

23 புத்தக தினம் மற்றும் காப்புரிமை தினம்

25 இறைச்சல் விழிப்புணர்வு தினம்

26 அறிவுசார் சொத்துரிமை பாதுகாப்பு நாள்

30 குழந்தை தொழிலாளர்கள் தினம்

மே

01 உலக தொழிலாளர் தினம்

03 பத்திரிகை சுதந்திர தினம்&சக்தி தினம்

04 தீயணைக்கும் படையினர் நாள்

02 ஆவது ஞாயிறு அன்னையர் தினம்

08 செஞ்சிலுவை தினம்&விலங்குகள் பாதுகாப்பு தினம்

12 சர்வதேச செவிலியர் தினம்

15 குடும்பங்கள் தினம்

17 தொலைத்தொடர்பு தினம்

16 தொலைக்காட்சி தினம்

18 அருங்காட்சியக தினம்

19 கல்லீரல் நோய் தினம்&பயங்கரவாதத்திற்கு எதிரான நாள்

21 உலக பண்பாட்டு தினம் &வன்முறை ஒழிப்பு தினம்

22 உயிரின பல்வகைமை தினம்

23 ஆமைகள் தினம்

24 காமன் வெல்த் தினம்

29 ஐக்கிய நாடுகள் சர்வதேச அமைதிக்காப்போர் தினம்&தம்பதியர் தினம்

31 புகையிலை எதிர்ப்புதினம்

ஜூன்

01 சர்வதேச சிறுவர் தினம்

05 சுற்றுபுறதினம்

08 சமுத்திர தினம்

03 வது ஞாயிறு தந்தைகள் தினம்

12 சிறுவர் தொழிலாளர்களுக்கு எதிரான உலகதினம்

14 இரத்ததான தினம்&வலைப்பதிவர் நாள்

15 மேஜிக் வித்தை தினம்

20 அகதிகள் தினம்

21 உலக இசை நாள்

23 இறைவணக்க தினம்

26 போதை ஒழிப்பு தினம்&26 சித்திரவதைக்கு ஆளான்னோருக்கான ஆதரவு நாள்

27 நீரிழிவு நோய் ஒழிப்பு தினம்

28 ஏழைகள் தினம்

ஜூலை

01 கேளிக்கை தினம்& மருத்துவர்கள் தினம்

01வது சனிக்கிழமை கூட்டுறவுதினம்

11 மக்கள் தொகை தினம்

15 கல்வி நாள்

3 வது ஞாயிற்று கிழமை தேசிய ஐஸ் கிரீம் தினம்

20 சதுரங்க தினம்

ஆகஸ்ட்

01 தாய்ப்பால் தினம்&சாரணர் தினம்

02 ந‌ட்பு ‌தின‌ம்

06 ஹிரோஷிமா தினம்

09 நாகசாகி தினம்&ஆதிவாசிகள் தினம்

12 இளஞர் தினம்

13 இடதுகை பழக்கமுடையோர் தினம்

14 கலாசார ஒற்றுமை நாள்

18 உள்நாட்டு மக்களின் சர்வதேசதினம்

30 காணாமற்போனோர் நாள்

செப்டம்பர்

05 இந்திய ஆசிரியர் தினம்

08 எழுத்தறிவு தினம்

18 அறிவாளர்கள் தினம்

15 மக்களாட்சி நாள்

16 ஓஷோன் தினம்

21 பொறியியல் வல்லுனர்கள் தினம்

26 ஊமை&காது கோளாதோர் தினம்

27 சுற்றுலா தினம்

அக்டோபர்

01 முதியோர் தினம்&இரத்ததான தினம்

02 சைவ உணவாளர் தினம்&அகிம்சை தினம்

03 குடியிருப்பு (உறைவிடம்) தினம்&வனவிலங்குகள் தினம்

04 விலங்குகள் நல தினம்

05 இயற்கை சூழல் தினம்

08 இயற்கை சீரழிவு குறைப்பு தினம்

10மரணதண்டனை எதிர்ப்பு தினம்

09 அஞ்சலக தினம்

12 உலக பார்வை தினம்

14 தர நிர்ணய நாள்

15 விழிப்புலனற்றோர் தினம்

16 உணவுதினம்

17 வறுமை ஒழிப்பு தினம்

18 இடப்பெயர்வாளர் தினம்

24 ஐக்கிய நாடுகள் சபை தினம்

30 சிந்தனைகள் தினம்

31 சிக்கன நாள்

நவம்பர்

11நினைவுறுத்தும் நாள்

14 நீரிழிவு நோய் தினம்

16 உலக சகிப்பு நாள்

17 அனைத்துலக மாணவர் நாள்

03 ஆவது வியாழக்கிழமை உலக தத்துவ நாள்

19 தேசிய ஒருமைப்பாட்டு தினம்

24 படிவளர்ச்சி நாள்

25 பெண்களுக்கு எதிரான அனைத்துலக வன்முறை ஒழிப்பு நாள்

26 சட்ட தினம்

29 பாலஸ்தீன மக்களுடன் சர்வதேச தோழமை தினம்

டிசம்பர்

01 எயிட்ஸ் தினம்

02 அடிமைத்தனம் ஒழிப்பு தினம்&ஒளிபரப்பு தினம்

03 ஊனமுற்றோர் தினம்

05 பொருளாதார மற்றும் சமுதாய முன்னேற்ற பங்காளர்களின் நாள்

06 மத நல்லிணக்க தினம்

07 கொடிதினம்

08 தேசிய மனவளர்ச்சி குன்றியோர் தினம்

09 விமானபோக்குவரத்து தினம்&ஊழல் எதிர்ப்பு நாள்

10 மனித உரிமைகள் தினம்

11 சர்வதேச மலை நாள்

17 பாலியல் பெண் தொழிலாளர்களுக்கெதிரான வன்முறையை நிறுத்தும் அனைத்துலக நாள்

18 சிறுபான்மையினர் உரிமை தினம்

21 சர்வதேச பல்லுயிர் பெருக்க நாள்

23 விவசாயிகள் தினம்

Tweet

வாசிப்பு என்னும் சுவாசிப்பு

அந்தக்காலத்தில் குழந்தை அழுதால் தாலாட்டு பாடி குழந்தையின் அழுகையை நிறுத்துவார்கள்.இப்பொழுதோ ரிமோட்டை கையில் கொடுத்து விட்டால் குழந்தையின் அழுகை ஸ்விட்ச் போட்டாற் போல் நின்று விடுகின்றது. வாசிப்புதன்மை சமூகத்தில் அருகி வருவதற்கு இதுதான் ஆரம்பகாரணம்.

நான்கு மாத குழந்தையை கையில் வைத்துக்கொண்டு நாம் டிவி முன் அமர்ந்தால் அந்த சிசு கண்ணிமைக்காமல் டிவி திரையை பார்க்க ஆரம்பிக்கின்றது.குழந்தையின் வாசிப்புத்திறன் குறைவதற்கு அடிக்கல் நாட்டு விழா இங்கேதான் ஆரம்பம்.

வாசிப்பு திறன் இருக்கும் குழந்தைகளுக்கு பேச்சில் தெளிவும்,ஞாபகசக்தியும்,கருத்தாழமும்,சொல்வதை கற்பூரமாக பற்றிக்கொள்ளும் திறமையும் ,பொதுஅறிவும் நிரம்ப பெற்றவர்களாக அமைகின்றனர் என்பது ஆய்வாளர்களின் கூற்று.பிற்காலத்தில் அறிவு செறிந்த மாணாக்கனாக தெளிவான கருத்துடையவனாக அவனது வாழ்கை மேம்பட துணை நிற்கும்.

வாசிப்புத்திறமை பெற்ற மாணவனுடைய செயல்களும்,சிந்தனையும் ஞாபகசக்தியும் வாசிப்புத்திறன் இல்லாத மாணவனில் இருந்து வித்தியாசப்படும்.வாசிப்புத்திறன் இல்லாத மாணவன் பள்ளியில் மட்டுமின்றி,சமூகத்திலும் சிறப்பு நிலை அடைவதென்பது மிகவும் கஷ்டமே.

வாசிப்பின் மூலமே மனிதன் சிறப்படைகின்றான்.இந்த வாசிக்கும் ஆர்வத்தை வளர்ப்பது ஒவ்வொரு பெற்றோரின் கைகளில்தான் உள்ளது.நான்கு மாதக் குழந்தை டிவி திரையை நோக்க ஆரம்பித்தால் அதனை அணைத்து விட்டு கலர் கலர் படங்கள்,பூக்கள் போட்ட புத்தகத்தை விரித்து காட்டுங்கள்.குழந்தை வளர வளர புத்தகங்களின் பக்கங்களை புரட்ட கற்றுக்கொடுங்கள்.குழந்தை பேச ஆரம்பிக்கும் பொழுது புத்தகத்தைகாட்டி கற்றுக்கொடுத்தலை ஆரம்பியுங்கள்.வாசிப்பின் ஆர்வம் தானாகவே ஆரம்பித்து விடும்.

குழந்தைக்கு பிறந்த நாளா?வீட்டில் விஷேஷமா?பொம்மை,வீடியோ கேம்,விளையாட்டு சாதனங்கள் என்று வாங்கி பரிசளிப்பதில் காட்டும் ஆர்வம் புத்தகம் வாங்கி பரிசளிப்பதில் இல்லை என்பது கவலை தரும் உண்மை.

ஒரு வீட்டை பற்பல கற்பனைகோட்டைகள் அடுக்கடுக்கடுக்காய் மின்ன பார்த்து பார்த்து கட்டுகின்றோம்.துணிவகைகள் வைக்க அலமாரி,நகைகள் வைக்க,மளிகை வைக்க,பொம்மைகள் வைக்க,பாத்திரங்கள் வைக்க,டப்பாக்கள் அடுக்க என்று ஒவ்வொன்றுக்கும் பார்த்து பார்த்து செய்கின்றோம்.எத்தனை வீட்டில் புத்தகங்களை பாதுகாத்து வைக்க என்று புக் செல்ஃப் அமைக்கின்றோம்?இதுவும் கவலை தரக்கூடிய உண்மையே.

பத்திரிகைகளில் வரும் குறுக்கெழுத்துப்போட்டிகள்,பஸ்ஸில்ஸ்கள் போன்றவற்றில் ஆர்வம் காட்டுபவர்களில் இளைய தலைமுறைகள் மிக மிக குறைவு என்பது கவலைக்குறிய விடயம்.குறுக்கெழுத்துப்போட்டியை பதினைந்து நிமிடங்களில் முழுமையாக நிரப்பி விடும் திறன் பள்ளிப்படிப்பை தாண்டாத தாய்க்கு அமையப்பெற்று இருந்தால், பல்கலைகழகம் படிக்கும் அவளது மகனுக்கு 4 கட்டங்களைக்கூட நிரப்ப இயலாத அளவிற்கு அவர்களது திறமை வேறு பக்கம் சிதறி இருக்கின்றது.

ஒரு புத்தகத்தை முழுதாக படிக்கும் நேரத்தில் கம்பியூட்டரில் டவுன் லோட் செய்து முழுதாக ஒரு படத்தினை பார்த்துவிடுவது இக்காலத்தின் கோலம்.இணையத்தில் தேவையற்ற தளங்களோ,சமூக தளங்களோ ஆற்றலை முழுமையாக தந்து விட இயலாது.ஒரு மாணவனை பரிபூரணமானவானாக,சிறப்பான மாணவனாக,அறிவான மாணவனாக இணையதளங்கள் உருவாகுவதை விட அம்மாணவனின் வாசிப்புதன்மை அவனது சிறப்பை வளப்படுத்துகின்றது.

குடும்பத்தில் விஷேஷமா?உடனே ரெஸ்டாரெண்டுக்கு குடும்பத்துடன் சென்று கற்றையாக பணத்தை கொடுத்து உண்டு மகிழ்கின்றோம்.ஒரு முறை சற்றே வித்தியாசமாக ஒரு புத்தகக்கடைக்கு அழைத்துச்செல்லுங்களேன்.வயிறு நிரம்புவதை விட மூளை நிரம்புவது நன்றல்லவா?

ஸ்விம்மிங்க் கிளப்பில் மெம்பராக,டென்னின்ஸ் கிளப்பில் மெம்பராக.கிரிகெட் கிளப்பில் மெம்பராக குழந்தைகளை சேர்த்து விடும் ஆர்வம் ஏன் நூலகத்தில் சேர்த்து விடுவதில் இல்லை?சிந்தியுங்கள்.சிறப்படைவீர்கள்.

குழந்தைகள் இன்னாள் விதைகள்.பின்னாள் விருட்சங்கள்.எதிர்காலத்தில் விருட்சங்கள் மரச்சட்டங்களாகவும்,அடுப்பெறிக்க உதவும் விறகுக்கட்டைகளாகவும் ஆகாமல் நல் விருட்சங்களாக,நிழல் தந்து உதவும் விருட்சங்களாக,காற்றினை சுத்தப்படுத்தும் ஊக்கிகளாகவும் சமூகத்துக்கு நன்மை பயக்கக்கூடிய விருட்சங்களாகவும் ஆற்றல் பெற வேண்டும் என்ற உண்மையை உணர்ந்து வாசிப்புத்திறனை நலவே வளர்த்து வாழ்க்கையெனும் இனிய பயணத்தை சீருடன்,சிறப்புடன்,பயனுள்ள வகையில் கழிப்போம்.

Tweet

அன்றும் இன்றும்.2

அரைகிலோவுக்கும் மேலுள்ள எடையில் கருப்பு நிற வஸ்துவை அந்நாளில் தொலைபேசியாக உபயோகித்து வந்தனர்,ஒவ்வொரு எண்ணிலும் ஆட்காட்டி விரலை நுழைத்து டயல் செய்து விரல் நுனி தேய்ந்து போகும்.இதில் ராங் காலகள் வேறு தொல்லை படுத்தும்.தொலைதூர ஊர்கள் நாடுகளுக்கு பேசுவதென்றால் கேட்கவே வேண்டாம்.டிரங்கால் புக் செய்து விட்டு போனுக்கடியில் மணிக்கணக்கில் பலி கிடந்தே ஆகவேண்டும்.இன்றோ கைக்குள் அடங்கும் செல்பேசிகள் நம் விரல் நுனியில் உலகையே சுற்றி வருகின்றதே.

1857 பிரெஞ்சுக்காரரான லியோன் ஸ்கொட் கண்டு பிடித்து கொடுத்தது உலகம் முழுக்க மூலை முடுக்கு,பட்டி தொட்டி எல்லாம் புகழ் பாடியது கிராம போன் என்ற பெயரில்.குழல் வடிவ மெகா பெரிய ஸ்பீக்கர். இன்றளவும் செம்பருத்திப்பூவைப் பார்த்தால் ஸ்பீக்கர் பூ என்று அடை மொழியுடன் அழைக்கிறோம்.மொத்தத்தில் ரேடியோ பெட்டி வீட்டையே அடைத்துக்கொள்ளும் அள்வு பெரிதாக இருக்கும்.பாடல்கள் அடங்கிய கருப்பு நிற இசைத்தட்டுகள் வலம் வந்த காலம் போய் சிறிய அளவில் கேஸட் வடிவில் வந்தது.அதுவும் மறைந்து சிடிகள்.டி வி டிக்கள் என்பது போக இன்றோ விரலளவு உபகரணத்தில் ஆயிரக்கணக்கான பாடல்களை பதிவு செய்து கண்களை சிமிட்டிக்கொண்டு வலம் வந்து கொண்டிருக்கின்றன ஐ பாட்கள்.

சார் தந்தி என்றால் அரண்டு விடுவார் அந்நாளில்.எந்த ஒரு செய்தியும் உடனடியாக கிடைக்க வேண்டும் என்றால் தந்திதான் தொலைத்தொடர்பு சாதனமாக இருந்து வந்தது.இன்றோ குறுந்தகவல்,மின்னஞ்சல்,பேக்ஸ் என்று அந்நாளில் நினைத்துப்பார்க்காத வசதிகள் எல்லாம் நம் முன்னே வலம் வருவது விஞ்ஞான முன்னேற்றம்.

இன்லாண்ட் லெட்டர் போஸ்ட் கார்ட்,கவர் என்று உலா வந்த காலம் அன்று.”சார் போஸ்ட்”என்ற குரலுக்காக காத்திருப்போர் அநேகர்.சிரத்தையாக கடிதம் எழுதி சிகப்புவர்ண பெட்டிக்குள் போட்டு விட்டு வாரக்கணக்கில் மாதக்கணக்கில் காத்திருந்தது போக இன்றோ உலகம் சிறிதாகி உள்ளங்கைக்குள் அடங்கி விட்டது.மெயில் போட்ட அடுத்த நொடி பதில் கிடைத்து பரவசப்படுதும் இன்னாள் பொன்னாள்தானே!

பண்டைய காலத்தில் பல பல பொருட்களில் இருந்து மைதயாரித்து ஓலைகளில் எழுதி சேமித்து வைப்பர்.அரிசியை வாணலியில் கருப்பாக வறுத்து,நைஸாக பொடித்து வெது வெதுப்பான நீரில் கரைத்து பாட்டிலில் சேமித்து வைத்தால் வருடக்கணக்கில் வரும்.இதனை மூங்கிலில் ஆன எழுதுகலத்தில் தோய்த்து ஓலைகளில் எழுதி வந்தனர்.அதன் பிறகு பேனா பென்ஸில் என்று தோன்றி ஓலைச்சுவடிகள் இருந்த இடம் தெரியாமல் போய் விட்டது.இன்றோ கணினியில் நோட் பேடை திறந்து நோகாமல் பக்கம் பக்கமாக எழுதி ஜமாய்த்து விடுகின்றோம்.தவறாக எழுதியதை அழிக்க இரேசர் தேவை இல்லை,கண் சிமிட்டும் நேரத்தில் அழித்து விடுகிறோம்.இது காலம் நமக்கு கொடுத்த பெரும் கொடை இல்லாமல் வேறென்ன?

அந்தக்காலத்தில் சீமை ஓடு நாட்டு ஓடு என்று வேயப்பட்ட கூரைகளுடன் கூடிய ஓட்டு வீடு இன்று காணாமலே போய் விட்டன.மிகக்குறைந்த பட்ஜெட்டில் குக்கிராமத்தில் கட்டப்படும் வீடு கூட காங்கிரட் கூரையுடன் அமையப்பெற்று இருக்கின்றன.

ஜல் ஜல் என்று சலங்கை ஒலியுடன் கூடிய செவலை மாடு.அலங்கரிக்கப்பட்ட பொட்டுவண்டிகளில் பூட்டி ஆடிக்கொண்டே அன்று சவாரி செய்தனர்.இலவம் பஞ்சால் செய்யப்பட்ட திண்டு அல்லது வைக்கோல் அடைத்து செய்யபட்ட திண்டு,வண்டியில் உபயோகப்படுத்தும் பர்மா தேக்கு பலகை அல்லது வேம்பலகை,வண்டியின் பக்கவாட்டில் தைக்கப்பட்டு இருக்கும் சீட்டி துணி அல்லது சாட்டின் துணி போன்றன வண்டியின் சொந்தக்காரர்களுக்கு மதிப்பை கூட்டும்.பொட்டுவண்டிகளில் செய்யப்படும் அலங்காரங்கள் வண்டிக்கு சொந்தக்காரர்களின் வசதியை பறை சாற்றும்.இன்றோ வித விதமான வாகனங்கள் சர்வ வசதிகளுடன் கூடிய வாகனங்கள் லட்சங்களையும் கோடிகளையும் கொட்டிக்கொடுத்து சாலைகளில் உலா வருகின்றன காரின் சொந்தக்காரர்களின் வசதிவாய்புகளை பறைசாற்றிக்கொண்டு.

அந்த நாட்களில் கூட்டுக்குடும்பம் அதிகம் இருந்த காலம்.வீடுகளில் இருக்கும் பாத்திர பண்டங்கள் இரும்பிலும்,செம்பிலும்,துத்தநாகத்திலும் மெகா சைஸில் இருக்கும்.இன்றுள்ள சிங்குகளில் வைத்து சுத்தம் செய்ய முடியாத அளவுக்கு அளவில் பெரிதாக இருக்கும்.பாத்திரங்கள் தேய்ப்பதென்றால் கிணற்றடிக்குத்தான் எடுத்து செல்ல வேண்டும்.இன்றோ கால ஓட்டத்திற்கேற்ப சிறிய அளவுகளில் காப்பர் பாட்டம்,நான் ஸ்டிக்,போரோசில் என்று அடுக்களையை அலங்கரிப்பது காலத்தின் கட்டாயம்.

காலை சாப்பாட்டுக்கு பிறகு முதற்காரியமாக இல்லத்தரசிகள் அமரும் இடம் அம்மியின் முன்புதான்.பகல் வேளைக்குத்தேவையான மசாலா ஐட்டங்களை மாங்கு மாங்கென்று அரைத்து உருண்டை பிடித்து வைப்பார்கள்.முழு விரலி மஞ்சலை நங் நங் என்று அம்மியில் இடித்து அரைக்கும் சப்தம் பக்கத்து வீட்டிற்கே கேட்கும்.இன்றோ பள பள பாக்கெட்டுகளில் மசாலா பொருட்கள் மார்கெட்டில் விறபனைக்கு கிடைப்பது போக மிச்சம் மீதி வேலையை மிக்ஸி செய்து விடுகின்றதே!

சிலு சிலு வென்ற வேப்பமர அரசமர காற்று,சுள் என அடிக்கும் வெயிலை தடை போடும் மரநிழல்,தனது தளவாடங்களை சுற்றிலும் பரப்பி வைத்துகொண்டு மரநிழலில் அமர்ந்து முடியை சீர்திருத்தும் நாவிதர்.வெள்ளைத்துணியை போர்த்திக்கொண்டு கண்களை சுகமாக மூடிக்கொண்டு நாவிதரிடம் தலையை கொடுத்துக்கொண்டு அரசியல் முதல் சினிமா வரை நாவிதர் பேசும் பேச்சினை கேட்டு உம் கொட்டிக்கொண்டு முடிவில் சில்லரையை பொறுக்கி கூலியாக கொடுத்து முடியை திருத்தியது போய் இன்றோ குளிரூட்டப்பட்ட சலூனில் குஷன் சீட்டில் ஜம் என்று சாய்ந்து கொண்டு எதிரே இருக்கும் எல் ஈ டி ஸ்க்ரீனில் ”வாடி வாடி வாடி க்யூட் பெண்டாட்டி”என்று குத்தாட்டம் போடும் சிம்புவின் நடனத்தை ரசித்துக்கொண்டே,”சார்,பேஷியல் பண்ணட்டுமா?முடிக்கு மசாஜ் பண்ணட்டுமா”என்று கேட்கும் சலூன் கடைக்காரரிடம் தலையை ஆட்டி விட்டு இறுதியில் பர்ஸை திறந்து கற்றையாக பணத்தை எடுத்துக்கொடுத்து விட்டு எதிரே இருக்கும் ஜம்போ கண்ணாடியில் முகத்தைப்பார்த்து தலையை கோதிவிட்டுக்கொண்டு வரும் காலம் வந்து பலகாலமாகி விட்டன்.

பெரிய நீள் சதுரமான மர பாக்ஸினுள் மேற்பகுதியில் ரோமன் லெட்டரில் எழுத்துக்கள் பொரிக்கப்பட்ட கடிகார எண்கள்,கனமான முட்கள்.கீழ் பகுதியில் பெண்டுலம் என்று சுவற்றினை அடைத்துக்கொண்டு ஹாலில் கம்பீரமாக வீற்றிருக்கும் கடிகாரம்.ஒவ்வொரு மணி நேரத்திற்கும் முதலில் இனிமையான மியூஸிக் ஒலித்து டொய்ங் டொய்ங் என்று பெண்டுலம் அடிக்கும் நாதம் காதில் இனிமையை நிறைக்கும்.அடிக்கும் பொழுது கடிகாரத்தினை ஏறிட்டு பார்க்கும் கண்கள் அடித்து முடிக்கும் வரை பார்வை நகராமல் இருக்க வைக்கும் ரீங்காரம்.இன்றோ காலஓட்டவெள்ளத்தில் காணாமல் போய் மினியேச்சரில் கடிகாரங்கள் பவனி வருகின்றது.

அன்றும் இன்றும் முதல் பாகம் பார்க்க

டிஸ்கி:உங்கள் எண்ணத்தில் உதயமான பொருட்களை பின்னூட்டுங்கள்.அன்றும் இன்றும் மூன்றாம் பாகம் போட்டு விடலாம்.உஷ்..அப்பாடா..அடுத்த பதிவுக்கு தேற்றியாச்சு:)

Tweet

அன்றும் இன்றும்.

1.அந்த நாள் உணவென்றால் கம்பங்கூழ்,கேப்பைக்கூழ்.அதனையும் தாண்டி இட்லி தோசை.இப்பொழுது கூழை காட்டி நம் இளைய தலை முறையினரிடம் கேட்டால் “வாட் திஸ் நான் சென்ஸ்” என்று முகம் சுளிப்பார்கள்.பிஸ்ஸா,பர்கர் என்று அயல் நாடு உள் நாட்டினுள் நுழைந்து அமர்க்களம் பண்ணிக்கொண்டுள்ளது.

2.அந்த நாளில் சிறுமிகள் விளையாடுவது மரப்பாச்சி பொம்மைகளைக்கொண்டும்,துணியினால் செய்யப்பட்ட சீலைப்பொண்ணு என்று செல்லமாக அழைக்கும் பொம்மைகளும்தான்.இப்பொழுதுஆயிரக்கணக்கில் செலவு செய்து தன் பிள்ளைகளுக்கு ஹைடெக்கான பார்பி போன்ற பொம்மை வகைகளை வாங்கிக்கொடுத்து மகிழ்விக்கின்றனர் இக்கால பெற்றோர்கள்.

3.அந்நாளில் அழுக்குத்துணிகளை மூட்டையில் கட்டிக்கொண்டு குளக்கரைக்கு கூட்டமாக போய் அரட்டை அடித்த படி துவைப்பார்கள்.அரட்டை அடிக்கும் சுவாரஸ்யத்தில் மூட்டை மூட்டையாக துவைத்தாலும் அலுப்பு தெரியாமல் இருக்குமாம். சில வீடுகளில் கொல்லைப்புறம் கிணற்றடியில் துவைக்கும் கல் கண்டிப்பாக இருக்கும்.நின்று கொண்டே துவைத்து பிழிந்து உலரப்போட்டது போக இன்று வாஷிங் மெஷினில் துணியைப்போட்டு கூடவே சலவைத்தூளும் போட்டு ஸ்விட்சை ஆன் பண்ணி விட்டு குஷாலாக ஹாண்ட்பேக்கை தோளில் மாட்டிக்கொண்டு இல்லத்தரசிகள் ஷாப்பிங் போய் விட்டு ஆற அமர வீட்டுக்கு திரும்பி துவைத்த துணிகளை உலரப்போடும் இக்கால இல்லத்தரசிகள் உண்மையில் கொடுத்து வைத்தவர்கள்தானே?

4.வெட்டி வேர் அல்லது நன்னாரி வேரை நசுக்கி துணியில் பொட்டலமாக கட்டி மண்பானையில் போட்டு காய்ச்சிய நீரை பானையில் நிரப்பி, புதுமணலை குவித்து வைத்து அதன் மீது மண்பானையில் வைத்த நீரை சொம்பில் மொண்டு குடித்தால் ஆஹாஹா..இப்பொழுதுள்ள இளையதலை முறையினர் இதனை ரொம்பவே மிஸ் பண்ணி விட்டார்கள்.தென்மாவட்டங்களில் `தணல் அடுப்பில் நெல் உமியை தூவி கிளம்பும் புகை மீது பானையை கவிழ்த்து வைத்து அதனுள் இருந்து வரும் நறுமணத்துடன் கூடிய நீரை இப்பொழுதும் நினைத்துக்கொண்டாலும் நாவில் நீர் ஊறும்.இப்பொழுதோ டிஸ்பென்சரில் பபுள்டாப் கேனை கவிழ்த்து சில்லென்று செயற்கைகுளிர் நீரை குடிக்கும் நிலைமை.

5.அந்நாளில் வீட்டு வாசலிலேயே மரநிழலில் உரலை வைத்து நெல் குத்துவார்கள்.இரண்டு பெண்கள் மாறி மாறி ஹ்ம்ம்..ஹ்ம்ம் என்ற சப்தத்தை வெளிப்படுத்திய படி நெல் குத்துவதை கற்பனை செய்து பார்த்தாலே நமக்கு வியர்த்துப்போகும்.இப்பொழுதோ அரிசி ஆலைகள் பெருகி நெல்மணிகளை படத்தில் பார்த்தால்தான் உண்டு.

6.உத்தரத்தில் கயிறு கட்டி அதனுள் சமைத்து வைத்த பொருட்களை ஒன்றுக்குமேல் ஒன்றாக அடுக்கி பிராணிகளிடம் இருந்தும்,பூச்சிவகைகளிடம் இருந்தும்,வீட்டில் இருக்கும் வாண்டுகளிடம் இருந்தும் பாதுகாத்தார்கள்.இன்றோ அழகுற கப்போர்டுகள் அமைத்து பாத்திரங்களை பாங்காக அடுக்கி வைத்து அழகு பார்க்கின்றனர்.

7.மரவேலைப்பாடுகள் கொண்ட கலை நயமிக்க ஓட்டைகள் உள்ள பலகை தயாரித்து இதனையும் உத்தரத்தில் கயிற்றினால் கட்டி தொங்க விட்டு இருப்பார்கள்.இதில் உள்ள ஓட்டைகளில் மர கரண்டிகள்,மத்து போன்றவற்றை மாட்டி வைக்கலாம்.இப்பொழுதோ குட்டியூண்டு ஸ்டாண்டில் டசன் கணக்கில் ஸ்பூன்களை மாட்டி வைத்து ஒரு ஓரமாக அடக்கமாக அமர்ந்து இருக்கின்றது இந்நாளைய ஸ்பூன்ஸ்டாண்ட்.

8.தானியங்களை தோலெடுக்க கல்லால் ஆன எந்திரம் அதன் கைப்பிடி மரத்தில் இருக்கும்.எந்திரத்தின் உச்சியில் உள்ள பள்ளத்தில் கொஞ்சம் கொஞ்சமாக தானியங்களை போட்டு மரக்கைபிடியை பிடித்துக்கொண்டு சுற்றும் பொழுது தானியங்களின் தோல் அகலும்.திரித்த தானியங்களை முறத்தால் புடைத்து பயறு வேறு தோல் வேறு என்று பிரிப்பார்கள்.இன்றோ தோலெடுத்து பள பளக்க பாலிதீன் பைகளில் தானியங்கள் அடைத்து வரும் பொழுது திரிகை காணாமல் போவது நியாயம்தானே?

9.மண்பானையில் தயிரை வைத்து மத்தால் கடைந்தால் வெண்ணெய் வரும்.

மண்பாணையை இரண்டு பாதங்களுக்கும் இடையில் வைத்துக்கொண்டு இரண்டு கைகளாலும் திரட்டுவார்கள்.மரத்தினால் செய்யப்பட்ட வித விதமான மத்துகள் பார்க்க கலை நயத்துடன் இருக்கும்.இப்பொழுதோ பித்தானை அழுத்தினால் சடுதியில் மோரும் வெண்ணையும் பிரிந்து வேலையை சுலபமாக்கி விட்டது.

10.மாலை வேளை வேலைகள் ஓய்ந்து அக்கடா என்று ஓய்வு எடுக்க முடியாமல் ஊற வைத்த உளுந்தையும் அரிசியையும் கை கையாக நீர் தெளித்து அரைத்து எடுத்தால்த்தான் மறுநாள் காலை டிபன் செய்ய முடியும்.இடது கையால் குழவியை ஆட்டிகொண்டே வலதுகையால் லாவகமாக அரிசியைத்தள்ளிக்கொண்டே அரைக்கும் அழகை பார்த்துக்கொண்டே இருக்கலாம்.இப்பொழுதோ அடுப்பில் குக்கர் இருக்க,தவாவில் சப்பாத்தி சுட்டுக்கொண்டே ஓரக்கண்ணால் ஓடும் கிரைண்டரை கவனித்தால் போதும்.மறுநாள் சுடச்சுட மல்லிகை இட்லி கெட்டி சட்னியுடன் பேஷாக சாப்பிடலாம்.

11.செய்த பதார்த்தங்கள் சூடாகவும்,மொறுமொறுப்பு குறையாமலும் இருக்க பனை ஓலைகளால் ஆன பெட்டிகளை தயாரித்து உணவுப்பொருட்களை வைத்திருப்பார்கள்.வெள்ளை நிற பனை ஓலையில் கலர் கலராக வண்ணம் தோய்த்து அழகுற டிஸைன் போட்டு இருப்பார்கள்.இன்னும் கொஞ்சம் ரிச் ஆக வேண்டுமென்றால் ஜரிகைகளால் பொட்டு போல் செய்து பதித்து இருப்பது கண்களைக்கவரும்.ஹாட்பாக்ஸ் தோன்றியதும் பனைஓலைப்பெட்டிகள் எல்லாம் காணாமல் போய் விட்டன.பெட்டி முடைபவர்களும் காணாமல் போய் விட்டனர்.

12.வீடென்றால் ஒரு கொல்லைப்புரம் இருக்கும்.கொல்லைப்புறம் இருந்தால் அங்கு பாய்லர் அடுப்பு இருக்கும்.அதிகாலையிலேயே தண்ணீர் கொதிக்க வைத்து நீரை விளாவி வைத்து வீட்டினர் குளிக்க வெந்நீர் தயாரிப்பதுதான் இல்லத்தரசிகளின் முதல் வேலை.இப்பொழுதோ கொட்டாவி விட்டு கொண்டே ஹீட்டர் ஸ்விட்சை ஆன் செய்து விட்டு மேலும் பத்து நிமிடம் இழுத்துப்போர்த்திக்கொண்டு தூங்கும் சுகம் உள்ளதே...!

13.தாத்தா,தாத்தாவுக்கு தாத்தா காலத்தில் மனிதர்கள் நடக்கும் பொழுது சரட்சரட் என்று சப்தம் ஒலிக்கும்.நல்ல பர்மா தேக்கினால் செருப்பு வடிவில் செய்யப்பட்ட மிதியடியில் நடுவே வசதிக்கேற்ப செம்பு பித்தளை,வெள்ளி பிடிகளால் அலங்காரம் செய்து இருக்கும்.வெள்ளிப்பிடி போட்ட மிதியடி அணிந்தவர்கள் மேல்மட்டத்தினர் என்று கொள்ளலாம்.அந்த செருப்பை இப்பொழுது அணிந்து கொண்டு நடப்பதென்றால் அது சர்க்கஸ் வித்தையாகிவிடும்.

தோட்டத்தொழிலாளிகள் பனை மட்டையை செருப்பு வடிவில் கத்தரித்து பனை நாரினால் செருப்பின் வாரை செய்து அணிந்து இருப்பார்கள்.கண்ணாடி பெட்டியினுள் கண்களை கவர உட்கார்ந்திருக்கும் அலங்கார செருப்பு வகைகளை வாங்கி அணியும் நமக்கு பலங்கால செருப்புகள் வியப்பை தரும்.

14.விருந்தினர்கள் வந்து விட்டால் அழகாக சுருட்டி மூலையில் நிறக வைத்திருக்கும் பாயை உதறிப்போட்டு ,விரித்து விருந்தினர்களை அமரச்செய்வார்கள்.வண்ணம் தீட்டி டிஸைன் செய்யப்பட்ட கோரைப்பாய்கள்.ஓலைப்பாய்கள் என்று விதம் விதமாக வலம் வந்த காலம் போய் ,உட்கார்ந்ததும் மனுஷனை உள்வாங்கிக்கொள்ளும் ஷோபாக்களை வரவேற்பு அறைகளை அலங்கரிக்கும் காலம் காலத்தின் வண்ணக்கோலம்தானே?

15.நாண்கு ஐந்து மனிதர்கள் கூட தாராளமாக உள்ளே அமரும் விசாலமான பெட்டகங்களில் இருந்து சிறிய சைஸ் பெட்டகங்கள் வரை அந்த காலத்தில் பிரசித்தம்.பெரிய பெட்டகங்களின்சாவியே அரை அடி நீளம் இருக்கும்.

கனமான அந்த பெட்டகத்தை கில்லாடி திருடர்கள் கூட எளிதில் திறக்க இயலாதவாறு உறுதித்தன்மையுடன் இருக்கும்.இதில்தான் ஆடை,அணிகலன்கள்,விலை உயர்ந்த பொருட்களை வைத்து பாதுகாத்தனர் நம் முன்னோர்கள்.இன்றோ பில்ட் இன் கப்போர்டுகள் வலம் வந்து எளிதாக்கி விட்டன.

16.மூன்று கற்களை முக்கோண வடிவில் வைத்து அதன் மீது பானை வைத்து சுள்ளிகளை வைத்து எரித்து சமைத்தார்கள்.பிறகு மண் அடுப்பை புதைத்து விறகால் சமைத்தார்கள்.காலத்தின் பரிமாணம் இன்று வழவழப்பான கிரானைட் மேடையில் ஹாப்ஸ் பொறுத்தி இது அடுக்களைதானா என்று வியக்கும் அளவிற்கு மாற்றங்கள் புகுந்து விட்டன.

17.முன்பெல்லாம் மதிய உணவு உண்ட பின் சிறு தூக்கத்திற்கு பிறகு முதல் வேலையாக வீட்டில் இருக்கும்கெரஸின் விளக்குகளை சுத்தப்படுத்தி திரியை நெம்பி விட்டு,கெரஸின் நிரப்பி தயாராக வைத்திருப்பார்கள்.இருட்ட ஆரம்பித்ததும்,விளக்குகளை எல்லாம் நெருப்பிட்டு எரியச் செய்து வீட்டு திண்ணையில் ஆரம்பித்து ஒவ்வொரு அறையாக வைத்து வெளிச்சத்தை உண்டாக்குவார்கள்.இந்த வெளிச்சத்தில்த்தான் படிப்பு,சமையல் எல்லாம்.இப்பொழுதோ ஸ்விட்ச் போர்டுக்கு போய் ஸ்விட்சை ஆன் செய்யக்கூட பொழுதில்லாமல் இருந்த இடத்தில் உட்கார்ந்த படி ரிமோட் மூலம் விளக்குகளை ஆன் செய்து இருப்பிடத்தை ஜகஜோதியாக மாற்றிக்கொண்டு இருக்கின்றோம்.

18.பனை ஓலையால் செய்யப்பட்ட விசிறிகள் விதிக்கு வீதி கிடைக்கும்.வியர்க்கும் பொழுது முகத்திற்கு எதிரே விசிறியை வைத்து வீசி காற்று வாங்கிக்கொள்வார்கள்.கணவர் தூங்கும்வரை வீசி விட வேண்டியது எழுதப்படாத சட்டம்.அதே போல் குழந்தைகளை தூங்க வைக்க அக்கால இல்லத்தரசிகள் கை வலி எடுக்கும் வரை விசிறிக்கொண்டே இருப்பார்களாம்.இப்பொழுதோ பொத்தானை தட்டினால் ஏஸியின் ஜில்லிப்பு அறை முழுக்க பரவி பரவசப்படுத்துகின்றதே.

Tweet