எப்படி எல்லாம் ஏமாற்றுவார் இந்த உலகிலே!

சென்ற வாரம் இரண்டு ஆட்கள் வந்து பிட் நோட்டீஸ்,விசிட்டிங்கார்ட்,கூப்பன் சகிதமாக வந்தனர்.

"மேம்..புதிதாக ஷாப் ஓப்பன் பண்ணுகின்றோம்."என அறிமுகப்படுத்திக்கொண்டனர்.

உங்கள் வீட்டில் உள்ள பெயர்களை சொல்லுங்கள்."குலுக்கல் முறையில் தேர்வு செய்து பரிசு தருகின்றோம்."என்றனர்.

இப்படி மாதிரி காரியங்களில் எனக்கு எப்போதும் நம்பிக்கை இருந்ததில்லை."இதெல்லாம் சரிப்பட்டு வராது.குலுக்கலும் வேண்டாம்,பரிசும் வேண்டாம்"என்று மறுத்தேன்.இருந்தாலும் விடாகண்டானாக பிடிவாதமாக பெயரைக்கேட்டு கூப்பனை நிரப்புவதிலேயே குறியாக இருந்தனர்.எவ்வளவோ மறுத்தும் கேட்கவில்லை.

"ஏன் மேம்,இதில் உங்களுக்கு எந்த நஷ்டமும் இல்லை.குலுக்கலில் தேர்வானால் பரிசுதானே கிடைக்கப்போகின்றது.என்கரேஜ் பண்ணுங்கள்"இப்படி பேசியே என் மனதை மாற்றி கூப்பனை நிரப்பவைத்தனர்.நானும் அரை மனது..இல்லை,இல்லை..கால் மனதுடன் கூப்பனை நிரப்பி கையில் கொடுத்தேன்.அனைத்தையும் வாங்கி வைத்துக்கொண்டு"மேம்..புரோஷசிங் சார்ஜ் டென் ருபீஸ் கொடுங்கள்.அதற்கு பில் கொடுத்துடுவோம்"என்றான்.கோபம் ஜிவ் என்று ஏறியது.

நான் கோபத்தைக்காட்டும் முன்"மேம்..பரவா இல்லை.உங்களுக்காக அந்த பைசாவை நானே போட்டுக்கொள்கிறேன்"என்று கிளம்ப ஆரம்பித்தான்.இன்னும் கோபம் அதிகமாகி "எனக்காக பைசா போடுவதற்கு நீ யார்?"என்று சப்தம் போட்டு பத்து ரூபாயை கொடுத்து அனுப்பி விட்டேன்.

நடந்ததை மறந்தும் போய் விட்டேன்.நேற்று மீண்டும் அந்த இரண்டு நபர்களும் வந்தனர்."மேம்..கங்கிராஜுலேஷன்"வாயெல்லாம் பல்லாக ஒரு பெரிய பார்சலுடன் வந்தனர்.

" உங்களுக்கு குலுக்கலில் எலக்ட்ரிக் குக்கர் பரிசு கிடைத்து இருக்கு"என்று அவர்கள் சொன்ன பொழுது அவர்களைப்பார்த்த பொழுது ஏற்பட்ட எரிச்சல் சற்று தணிந்தது.'அட..பரவாஇல்லையே.அன்னிக்கு இந்த ஆட்களிடம் அவ்வளவு கோபம் காட்டினோமே'என்று நினைத்துக்கொண்டேன்.

பார்சலைக்கீழே வைத்துவிட்டு ,பாக்கட்டில் இருந்து ஒரு பில்லை எடுத்து நீட்டுகின்றனர்."மேம்..50 பெர்ஸண்ட் ஆஃப் மேம்.மார்க்கட்டில் இந்த குக்கர் விலை 4500.உங்களுக்கு 2250க்குத்தான் கிடைத்து இருக்கின்றது"என்கிறார்.

எனக்கு வந்ததே கோபம்."என்னப்பா,விளையாடுகிறீர்களா?"என்று சப்தம் போட்டேன்.அந்த கை தேர்ந்தவர்கள் என் கோபத்தை பார்த்து அசரவில்லை.என் தலையில் கட்டி பணத்தை வாங்கிக்கொண்டு போவதிலேயே குறியாக இருந்தனர்

."இதே போல் குக்கர் என்னிடமும் உள்ளது.நீங்கள் வேண்டுமானால் எனக்கு 2000 மட்டுமே தந்துவிட்டு எடுத்து செல்லுங்கள்"இப்படி எவ்வளவோ சொல்லியும் கேட்கவில்லை.கோபம் தலைக்கேற கேட்டை காட்டி"முதல்லே வெளியே போ"நான் போட்ட சப்தத்தில் இருவரும் எஸ்கேப்.உங்கள் வீட்டிற்கும் வரலாம்.ஜாக்கிரதை!

Tweet